Barbara mær

Barbörukórinn flytur nýja íslenska kórtónlist í bland við klassíska sálma og ættjarðarlög þann 19. júní á Sönghátíð Hafnarborgar. Nú á vordögum hljóðritaði kórinn ný íslensk verk, sem samin voru sérstaklega fyrir kórinn, og verða nú að hluta til flutt á tónleikunum á Sönghátíð í Hafnarborg. Umfjöllunarefni verkanna tengjast öll með einum eða öðrum hætti sambandi manns, náttúru og andlegs lífs í þessu harðbýla landi og endurspegla þau ólíku öfl sem þjóðin hefur sótt í styrk og æðruleysi í gegnum aldirnar – allt frá heiðni til kristni, frá huggun skáldskapar og þjóðsagna til samsemdar með náttúru- og dýralífi landsins.