Barna- og unglingakór

Barna- og unglingakór Hafnarfjarðarkirkju
í kirkjunni eru starfræktir tveir kórar fyrir krakka á aldrinum 6-16 ára. Á kóræfingum er sungið saman, farið er í leiki og tækifæri gefst á að mynda ný vinatengsl. Kórastarfið snýst mikið um að undirbúa viðburði sem kórarnir taka þátt í bæði innan kirkjunnar sem utan hennar. Undanfarin ár hafa fjölmörg ungmenni tekið þátt í blómlegu kórastarfi kirkjunnar og notið sín í góðum félagsskap.

Kórarnir taka þátt í ýmsum viðburðum og því er lagavalið mjög fjölbreytt.
Fastir viðburðir síðastliðin ár hefur verið að syngja á Jólavöku við kertaljós, Syngjandi jólum í Hafnarborg, Jólatónleikum með Guðrúnu Árnýju, sameiginlegri æskulýðshátíð hafnfirskra kirkna og á kóramóti hafnfirskra barnakóra í Víðistaðakirkju. Einnig heldur kórinn sjálfstæða Jóla- og Vortónleika þar sem afrakstur starfsins eru gerð skil.

Þátttaka
Öll börn frá 1. -10. bekk eru velkomin í kórinn. Ætlast er til að kórfélagar mæti á æfingar og þegar kórinn kemur fram nema um veikindi sé að ræða. Lagaval miðast við þann hóp sem skráður er og því er gert ráð fyrir að þeir sem stundi æfingar mæti einnig þegar kórinn komi fram. Í upphafi annar er birt dagskrá svo að foreldrar geti gert ráð fyrir viðburðunum í tíma.

Kórklæðnaður
Þegar kórinn kemur fram eru kórfélagar í snyrtilegum svörtum og/eða hvítum fötum að eigin vali. Klæðnaðurinn er stundum brotinn upp með rauðu fyrir jólin­ og með sumarlitum á vorin.

Uppbrot
Á hverju ári eru nokkur uppbrot á kórastarfinu. Árlega fer unglingakórinn í einna til tveggja nátta æfingabúðir sem eru mikilvægur hluti þess að hrista hópinn saman.

Önnur uppbrot eru t.d. náttfatapartý, æfingadagar, kóraheimsóknir og ofl. Að vori fara kórarnir annaðhvort í óvissuferð eða vorferð. Á nokkurra ára fresti hefur unglingakórinn farið í vorferð erlendis t.d. til Danmerkur, Ungverjalands, Noregs, og síðast til Ítalíu.

Foreldrasamstarf
Áhersla er lögð á gott samstarf við foreldra. Þeirra er að fylgjast með dagskrá kóranna og gera ráð fyrir æfingum og atburðum.

Mikilvægt er að tilkynna veikindi eða önnur nauðsynleg forföll með sms eða lokuðum skilaboðum á facebook. Þá er einnig treyst á aðstoð foreldra t.d. í kringum æfingabúðir og/eða vorferðir. Það hefur margoft sýnt sig að hvatning og stuðningur foreldra skiptir sköpum fyrir kórastarfið.